“Bakı” klubu Premyer Liqada ardıcıl 3-cü dəfə ev oyununda məğlub oldu. Martın 7-də “Neftçi”yə 1:3, 11-də “İnter”ə 0:1 hesabı ilə yenilən bakılılar ayın 24-də “Qarabağ”a 1:2 hesabı ilə uduzaraq öz meydanında ardıcıl 3-cü dəfə uduzdu. Komanda “Bakı” adı altında çıxış etdiyi 2004-cü ilin yayından sonra belə uğursuz seriyaya malik olmamışdı.

Klub tarixinin sonuncu belə seriyası 2002-03-cü illərdə komanda “Dinamo-Bakılı” adlanan vaxt qeydə alınıb. 2001/02 mövsümünün son 2 ev oyununda “Turan”a 0:1, “Ümid”ə 0:3 uduzan paytaxt təmsilçisi 9 il əvvəl - 2003/04 mövsümünün startında “Şəfa”ya 1:2, “Turan”a 0:1 hesabı ilə uduzaraq 4 ev oyununu xalsız başa vurmuşdu.

Klub tarixinin ən uğursuz ev seriyası 2001-ci ilin mart-oktyabr aylarında qeydə alınıb. Həmin vaxt komanda ardıcıl 7 ev matçında uduzub.

**
Kənan Kərimovun rekordu yarılandı

Zaqatalanın “Simurq” klubunun futbolçusu Anatoli Doroş yeni komandasında qol hesabını açıb. Premyer Liqanın XXV turunun “Sumqayıt”la oyununda qol sevinci yaşayan moldovalı legioner bununla da Azərbaycan rekorduna sevinib. Belə ki, o, Premyer Liqada 5 klubun heyətində qol vuran ilk legioner olub.

Bunadək Doroş “MKT-Araz”da 8, “Standard”da 4, “Karvan”da 6, “Olimpik”də 12 qol vurmuşdu. Premyer Liqada 84-cü matçında 31-ci qoluna imza atan Anatoli bu matçadək rekordun şəriki olan Leonardo Roşa və Tagim Novruzovu arxada qoyub. Braziliyalı futbolçu “Standard”, “İnter”, “Bakı” və “Qarabağ”ın heyətində qol sevinci yaşayıb. Novruzov isə “Simurq”, “Turan”, “Muğan” və “Rəvan”da bunu bacarıb.

Premyer Liqanın mütləq rekordu 10 klubun heyətində qol vuran Kənan Kərimova məxsusdur. O, “Şəmkir”, “Turan”, “Kəpəz”, “Viləş”, “Qəbələ”, MOİK, “Pambıqçı” (Bərdə), “Karvan”, “Qarabağ”, “Avtomobilçi”nin heyətində qol vurub. Legioner rekordçu isə Kənanın rekordunu yalnız yarılaya bilib.

***
Yunis Hüseynovun 50-ci “sülh”ü

“Xəzər Lənkəran”ın baş məşqçisi Yunis Hüseynov yeni klubunda ilk xalını qazanmaqla, həm də karyerasında 50-ci bərabərliyə nail olub. Belə ki, “Neftçi” ilə Premyer Liqanın XXV turundakı 1:1 hesablı heç-heçəyədək Hüseynovun komandaları 49 heç-heçə etmişdi.
“Karvan”da 44 bərabərlik görən mütəxəssis 36 dəfə Premyer Liqa, 7 dəfə Azərbaycan kuboku, 1 dəfə isə UEFA kubokunda qalibin müəyyənləşməməsinə şahid olmuşdu. “Standard”ın Hüseynovun rəhbərliyi altında imza atdığı heç-heçələrin 5-i də çempionatda olubsa, “Xəzər Lənkəran” da ilk bərabərliyi Premyer Liqada əldə etdi.

***
Hacıyevdən Sxadadzeyə yubiley qolu

Bakının “İnter” klubu baş məşqçisi Kaxaber Sxadadzenin rəhbərliyi altında Premyer Liqada 100-cü qolunu vurub. XXV turun “Qəbələ” ilə səfər oyununda rəqib qapısına yol tapan Nizami Hacıyev Sxadadzenin yetirmələrinin yubiley qolunun müəllifi olub.
“İnter” Sxadadzenin rəhbərliyi altında 2009/10 mövsümündəki 32 oyunda 47 (təsnifat mərhələsi 36, final mərhələsi 11), 2010/11 mövsümündəki 32 matçda isə 29 qol (təsnifat mərhələsi 24, final mərhələsi 5) vurmuşdu. Cari mövsüm təsnifat mərhələsini 21 qolla tamamlayan paytaxt təmsilçisinin final mərhələsindəki 3-cü qolu yubiley əhəmiyyətli oldu.
Qeyd edək ki, Sxadadzeyə qədər legioner baş məşqçilərdən yalnız ikisi Premyer Liqada 1 klubda 100-dən artıq qol sevinci yaşamışdı. Valentin Xodukin “İnter”də 146, Roman Pokora “Simurq”da 128 qol görmüşdü.