Peşəkar Futbol Liqası

2013-cü ilin ölkələr üçün UEFA klub reytinqi
(təsnifat mərhələsindən sonra)

Rekord, rekord, rekord

1994/95 mövsümündə avrokuboklarda debüt edən Azərbaycan 18 illik qitə kubokları tarixində ən yaxşı nailiyyətini “Neftçi”nin qrupa düşməsi ilə əldə etdi. Lakin bu uğur həm də ölkəmizin UEFA reytinqindəki rekordlarına səbəb oldu. 1 mövsümə 2,250, 5 ilə 7,791 xalın toplanması, üstəlik 34-cü yer futbol tariximizdə indiyədək görünməmiş nəticələrdir. Əslində bu rekord da qeyri-adi heç nə yoxdur. 2008-ci ildən başlayaraq Azərbaycan UEFA reytinqində irəliləməkdə, hər mövsüm rekord müəyyənləşdirməkdə davam edir. Öz xallarını 2006-cı ildən başlayaraq hər dəfə rekord həddə çatdıran Azərbaycan reytinqdəki yerinə görə 2007-ci ildəki 44-cü pilləni 5 ildə 10 addım irəli – 34-cü yerə dəyişib.

Azərbaycan UEFA reytinqində

Yalnız irəli!

Hazırda 7,791 xalla 34-cü olan Azərbaycan üçün bu, son hədd deyil. Çünki “Neftçi” Avropa liqasının qrup mərhələsində daha 6 oyun keçirəcək. 1999-cu ildən öz meydanında avrokubok oyunu uduzmayan bakılıların İtaliya “İnter”i, Rusiya “Rubin”i və Serbiya “Partizan”ı ilə ən azı ev oyunlarında uduzmayacağına ümid etmək olar. Rəqiblər nə qədər güclü olsa da azarkeş dəstəyi qarşısında Azərbaycanın reytinqinə növbəti xallar gətirmək mümkündür.

Tarixdə ilk dəfə təsnifat mərhələsini arxada qoyub əsas mərhələyə keçməyimiz xalların da dəyərini artırıb. Belə ki, artıq “Neftçi”nin qələbəsi 1 deyil, 2, heç-heçəsi 0,5 deyil, 1 xalla qiymətləndiriləcək. Bu isə klublarımızın sayına nisbətinə görə reytinqə müvafiq olaraq 0,500 və 0,250 xal qazandıracaq.

2013-cü ilin ölkələr üçün UEFA klub reytinqinin təsnifat mərhələsindən sonra 34-cü olan Azərbaycan təmsilçisi mübarizəni davam etdirdi. Bu ölkələr arasında sonuncu olan isə məhz Azərbaycandır. Yəni bizdən arxada olan 25 ölkənin təmsilçiləri artıq mübarizəni dayandırıb. Onlardan heç birinin ölkəmizi keçə bilməməsi isə yalnız irəli yolun olduğunu göstərir. İrəliləmək isə o qədər çətin görünmür.

Ən yaxın qonşularımız Bosniya və Herseqovina ilə Finlandiyanın komandası qalmayıb. Onlardan müvafiq olaraq 0,042 və 0,717 xal geri qalırıq. İstənilən 1 heç-heçə ilə balkanlılar arxada qalacaq. Skandinaviyalıları keçib 32-ci pilləyə yüksəlmək üçün isə 1 qələbə və 1 heç-heçə və ya 3 heç-heçə lazımdır. 33-cü yerlə müqayisədə 32-cilik daha çətin görünsə də mümkünsüz deyil.

1,375 xal gerisində qaldığımız, lakin təmsilçisi olmayan Gürcüstanın 30-cu yerinə iddia etmək isə ev qələbələrindən asılıdır. Kiprdə heç kimin gözləmədiyi möhtəşəm oyunu qrupda göstərməklə 3-cü “onluğ”u da hədəfləmək olar. Bunun üçün bizim kimi 1 komandası qalan Sloveniya ilə 1,167 xallıq fərq də aradan qaldırılmalıdır. Çətin, amma mümkün olan vəzifə “Neftçi”nin üzərinə düşür.

Üfüqdə nələr var?

Azərbaycanın UEFA reytinqində irəliləməsi avrokuboklardakı çıxışlarımıza təsirini göstərəcək. Lakin bu, daha çox qarşıdakı mövsümlərdə faydasını verəcək. Bu il “Neftçi”nin qrupa düşməsi, “İnter”lə “Xəzər Lənkəran”ın heç olmasa 1 mərhələ keçməsinin bəhrəsini növbəti yarışlarda bütün klublarımız, ümumilikdə Azərbaycan futbolu görəcək.

Artıq qarşıdakı – 2013/14 mövsümündə demək olar ki, bütün klublarımız püşk zamanı səpələnmişlər səbətində qərarlaşacaq. Çünki 2013-cü ilin UEFA klub reytinqində təmsilçilərimizin mövqeyi və xal hesabı xeyli yaxşılaşıb. Cari mövsüm 2012-ci ilin analoji reytinqi nəzərə alınaraq komandalar səbətlərə bölünürdü. Bunun nəticəsi idi ki, “Neftçi” hər dəfə səpələnməmişlər səbətində yer alıb, özündən yuxarı reytinqli rəqiblə qarşılaşırdı.

Klublarımızın cari mövsümə hansı reytinqlə qatıldığını xatırladaq:

212. “Qarabağ” – 5,241
275. “Bakı” – 3,241
305. “İnter” – 2,491
320. “Neftçi” – 2,241
330. “Xəzər Lənkəran” – 1,991
360. AZAL – 1,491
360. “Simurq” – 1,491

2013/14 mövsümündə isə klublarımızın reytinqi tam fərqli olacaq. “Neftçi”nin qrupda qazanacağı xalları nəzərə almadan bu əmsallar aşağıdakı kimi olacaq:

221. “Qarabağ” – 5,558
246. “Neftçi” – 4,558
267. “Bakı” – 3,808
299. “İnter” – 3,308
323. “Xəzər Lənkəran” – 2,808
371. AZAL – 1,808
371. “Simurq” – 1,808

Bu isə o deməkdir ki, klublarımız ən azı ilk təsnifat mərhələlərində səpələnəcək. Lakin “Neftçi”nin reytinqi daha yüksək ola bilər. Çünki Azərbaycan futbolu tarixində klubumuz əsas mərhələdə xal toplamaq imkanı qazanıb. Bu isə “Neftçi”nin şəxsi reytinqinə daha böyük töhfə verəcək.

Rədd olsun I təsnifat!

Avrokuboklarda ölkələrin təmsilçiliyə UEFA-nın İştirakçılar vərəqi ilə tənzimlənir. Bu isə 1 mövsüm əvvəlki ölkələr üçün UEFA klub reytinqi ilə müəyyənləşir. 2013-cü ilin analoji cədvəli, yəni 34-cü olduğumuz siyahı 2014/15 mövsümünə tətbiq olunacaq. Bu siyahıya əsasən də hansı komandamızın haradan mübarizəyə başlaması müəyyənləşəcək.

Bunun nə demək olduğunu cari – davam edən mövsümün İştirakçılar vərəqinə baxmaqla izah edək. 2011-ci ilin ölkələr üçün UEFA klub reytinqinə əsasən qurulan İştirakçılar vərəqində Azərbaycan 37-ci idi. Ona görə də 1 təmsilçimiz Çempionlar Liqasının II təsnifat mərhələsində, digərləri isə Avropa Liqasının I təsnifat mərhələsində mübarizəyə başladı. 2013/14 mövsümündə 2012-ci ilin reytinqinə, 37-ci olduğumuz cədvələ əsasən klublar bölünəcək.

2014/15 mövsümündə isə biz 34-cü yerin sahibi kimi olacağıq. 2012/13 mövsümünün İştirakçılar vərəqinə əsasən 34-cü yer üstünlük əldə edib. Bu üstünlük Avropa Liqasındakı 3 təmsilçimizdən birinin – kubokun sahibinin II təsnifat mərhələsindən yarışa qatılmasından ibarətdir. Düzdür, 32-36-cı yerlər cari mövsüm üçün bu üstünlüyü son anda alıb. Belə ki, aşağıdakı cədvəldə rəngli xanalarda göstərilən iştirakçılar UEFA-nın cədvəldəki dəyişikliklərin sayəsində mümkün olub. Bu dəyişikliklər Çempionlar Liqası və Avropa Liqasının qaiblərinin kimliyindən asılı olur. Yəni onların öz ölkələrində hansı nəticəni göstərməsi İştirakçılar vərəqində cüzi dəyişikliklərə səbəb olur. Bir sözlə 34-cü yerlə kubokun sahibinin II təsnifat mərhələsindən başlayacağını təxmin etmək olar. 32-ci pilləyə yüksəlsək isə bu, artıq dəqiq olacaq. 27-ci pillə isə kubokun sahibi ilə yanaşı vitse-çempionu da I təsnifat mərhələsindən azad edəcək. Bizim üçün hələlik uzaq görünən 21-ci yerin sahibi isə I təsnifat mərhələsindən ümumiyyətlə azad olunur. Komandalarımızdan heç olmasa birinin III təsnifat mərhələsindən yarışa başlaması isə yalnız ilk “20-liy”ə düşməyimizdən sonra mümkün olacaq.

2012/13 mövsümü üçün İştirakçılar vərəqi
(2011-ci ilin ölkələr üçün UEFA klub reytinqinə əsasən)