Unibank Premyer Liqasının 28-ci turunda doğma meydanda “İnter”i 2:1 hesabı ilə məğlub edən “Neftçi” növbəti çempionluğuna bir addım da yaxınlaşdı.

Kaxaber Sxadadze, “İnter” klubunun baş məşqçisi: “”Neftçi”ni qələbə münasibəti ilə təbrik edirəm. Bu qələbə ilə demək olar ki, çempionluğu təmin etdilər. Komandam məğlubiyyətinə baxmayaraq, layiqli oyun göstərdi. Buraxılan qollarda futbolçuların fərdi səhvləri var idi. Artıq qarşıdakı kubok oyunlarına hazırlaşmaq və qalib gəlmək lazımdır”.

Böyükağa Hacıyev, “Neftçi” klubunun baş məşqçisi: “”İnter” “Neftçi”yə layiqli rəqibdir. Bu gün iki fərqli hissə izlədik. İlk 15 dəqiqədə rəqibin müdafiədəki səhvlərindən istifadə etdik. Lakin sonradan meydanın mərkəzində mübarizəni uduzduq. “İnter”lə kubokun yarımfinal mərhələsində də qarşılaşacağıq. Çətin oyunlar olacaq. Bugünkü oyunda qalib gəldiyimiz üçün şadam”.