Topaz Premyer Liqasında sentyabr və oktyabr aylarının ən yaxşılarının mükafatlandırılması mərasimindən sonra KİV nümayəndələrinin sualları cavablandırıldı.

Ramin Musayev: “Saytların birində “Neftçi”nin keçmiş məşqçisi Tərlan Əhmədovun açıqlaması yer alıb. Bu açıqlamada mənim onu “Neftçi”yə məşqçi postuna təqdim etdiyim bildirilir. Mən heç bir kluba nə futbolçu, nə də məşqçi təqdim etmirəm, onun “Neftçi” klubuna keçidində də rolum yoxdur. Böyükağa Hacıyevin zamanında məşqçilər korpusunda idi və klubunun uğurlarında birgə pay sahibi idilər. Yalnız “Qarabağ” rəhbərliyinə Rasim Kara çempionatın başlamasına bir neçə gün qalmış klubu tərk etdiyində onlara Qurban Qurbanovu məsləhət görmüşəm. “Turan-T” klubunda baş verənlər haqqında xəbərsizəm, olanlar haqqında KİV vasitəsi ilə xəbər tutdum. Dünyanın hər bir yerində, istənilən klubda maliyyə problemi ola bilər. Futbolçularına milyonlarla borcu olan klublar var. Elə bir hakim yoxdur ki, oyun boyu səhv etməsin. İstənilən ölkə çempionatında, Avropa və Dünya miqyaslı yarışlarda belə hakim səhvləri olur. Ayın hakimini seçmək gözəl təklifdir, bunu həyata keçirməyi KİV nümayəndələrinin öhdəsinə buraxmaq olar. “Böyük oyun”da qonaq komandaların azarkeşlərinin olmaması təəssüfləndiricidir. Bu qərarı ləğv etmək mənim ixtiyarımda deyil. Mən azarkeşsiz oyunların əleyhinəyəm. Klubda işləyərkən qarşılıqlı razılıq əsasında həm rəqib komandanın futbolçusunun cəzasının, həm də azarkeşsiz oynamaq haqqında qərarın ləğv olunmasına razılıq verdim. Futbol azarkeşlər üçün oynanılır. Azarkeşlər oyun boyu bir-birini təhqir etməli deyil. “Xəzər Lənkəran”ın ev oyunlarını keçirdiyi stadionda PFL və Topaz-ən bannerləri artıq yerləşdirilib. Əvvəlki oyunlardan fərqli növbəti oyunda artıq bannerləri görə bilərsiniz. Tərəflər arasında bununla bağlı heç bir narazılıq yoxdur. Milli komandanın baş məşqçisi Berti Foqts çempionat oynularını canlı izləyərsə, onun bu postda qalmasının tərəfdarıyam. Onun rəhbərliyi ilə milli komandada intizam artıb, ümumilikdə çox böyük nəticə verməsə də, komanda son oyunlarda uğurlu çıxış etdi. Mövsüm başlayandan “Simurq” və “İnter”, “Bakı” və “Rəvan” klubları haqqında əsassız söhbətlər ortaya çıxmağa başladı. Premyer Liqamızda oyun alqı-satqısı haqqında ümumiyyətlə düşünmürəm. Çempionatda çıxış edən hər bir komandanı yalnız öz oyunu düşündürür. Topaz Premyer Liqasının yayım hüquqlarını almaq istəyən xarici şirkət haqqında dəqiq məlumat gələcəkdə olacaq. Son görüşümüzdə fikirlərinin qəti olduğunu bildirdilər. Premyer Liqada çıxış edən klubların Bakının regionlarını təmsil etməyinin tərəfdarıyam. AZAL “Şəfa” stadionunda oynayanda çox az sayda azarkeşi var idi. İndi isə Şüvəlanda keçirdiyi ev oyunlarında azarkeş artımı var. “Qarabağ” Quzanlı qəsəbəsində oynayanda stadion azarkeşlə dolu olurdu. Komandaların bir çoxunun Bakını təmsil etməsi azarkeşlərin stadiona gəlməsinə maneə olur. Region komandalarının azarkeşlər stadionda daha çox olur”.

İsmayıl Kalefer: “Topaz Premyer Liqasının oyunlarının mərc proqramına təkli şəkildə daxil edilməsinin biz də tərəfdarıyıq. Buna müsbət rəy olarsa gələcəkdə Premyer Liqanın da oyunlarını təkli və canlı oyun şəkildə oyun proqramında görəcəksiniz. Premyer Liqamıza marağı daha da artırmaq üçün bu addımı atmaq istəyirik. Topaz-ın satış məntəqələrini ilk olaraq Bakı və ətraf rayonlarda açdıq. Naxçıvan MR-də də Topaz satış nöqtələrini açmaq istərdik. Gələcəkdə bununla bağlı müzakirələr aparmağı düşünürük. Topaz Premyer Liqasında indiyədək keçirilən oyunların heç birinin nəticəsindən şübhələnməmişik. Hər hansı şübhəmiz olsa müvafiq qurumlara araşdırma ilə bağlı müraciət edərik. Əgər hər hansı bir oyuna maraq həddindən artıq çox olursa biz onu proqram çıxara bilərik. Dünyanın bir çox bukmeker şirkətlərində bu praktika tətbiq olunur. Oyun proqramına hər hansı bir ölkənin bir oyununu daxil edə bilmərik. Ölkə çempionatını istifadəçilərin marağına əsasən proqrama əlavə edirik. Maraq kəsb etməyən liqaları isə proqramdan çıxarırıq”.

Rauf Əliyev: “Ümumi götürəndə komandamız hələ təzədir. Komanda qarşıdakı oyunlarda daha da yaxşı çıxış etməyə çalışacaq. Mən və Əfran 11 yaşımızdan bir yerdə oynayırıq. Əvvəl “Qarabağ”da, indi “Bakı”da, həm də milli komandada. Futbolçuların bir-birini tam başa düşməsi üçün vaxt lazımdır”.

Reynaldo Silva: “Ayın oyunçusu seçildiyim üçün şadam. Mənə səs verən hər kəsə təşəkkürümü bildirirəm. Ciddi təklif olarsa Azərbaycan milli komandasında çıxış etmək haqqında düşünərəm. Hal-hazırda beten diqqətimi klubdakı çıxışıma yönəltmişəm”.