![](uploads/neftciyeni.jpg) Topaz Premyer Liqasının
10-cu turunun açılış oyununda “Neftçi” doğma meydanda “Rəvan”la qarşılaşdı.
Oyunun ilk hissəsini məğlub başa vuran Tərlan Əhmədovun yetirmələri ikinci hissədə
əzmkar qələbə ilə azarkeşlərini sevindirdi – 2:1.
Şahin Diniyev, “Rəvan”
klubunun baş məşqçisi: “Komandanın son bir həftədə keçirilən məşqlərindən sonra
bugünkü oyun göstərdi ki, fiziki hazırlığımız istənilən səviyyədə deyil. İkinci
hissədə futbolçularda güc qalmadı, müdafiədə oynadıq. İlk hissədə Miloş Adamoviçə
topa nəzarət etmək tapşırığı verilmişdi, öhdəsindən gələ bilmədiyi üçün əvəzləndi.
Fikrimcə, “Neftçi” göstərdiyi oyunla qələbəyə layiq idi. Rəqib futbolçuların
ustalıq səviyyəsi çox üstün idi. Komandanın oyununda çatışmazlıqlar var,
bunları aradan qaldırmağa çalışacağıq”.
Tərlan Əhmədov, “Neftçi”
klubunun məşqçisi: “Premyer Liqada yaranan hər uzun fasilədən sonra komandanı
tam heyətlə yığıb məşq keçə bilmirdik. Milli komandada bir neçə fubolçumuz
çıxış edir. Hər bir komandaya yeni baş məşqçi təyin olunanda futbolçular özlərini
daha da yaxşı göstərməyə çalışırlar. İlk 35 dəqiqədə, sanki, özümüzdə deyildik.
Oyunun qalan hissələrini isə üstün oynadıq, istədiyimiz oyunu göstərdik. Qalib
gəldiyimiz üçün şadam”.
|