“Neftçi” Azərbaycan çempionatlarında 500-cü qələbəsini qazanıb. Yubiley Misli Premyer Liqasının XXVI turuna təsadüf edib. “Ağ-qaralar” səfərdə “Şamaxı”nı 1:0 hesabı ilə üstələyib.
Bakılılar ölkə çempionatındakı 879-cu matçında “500”ə çatıb. Paytaxt təmsilçisi evdə 276, səfərdə 217, neytral meydanda 7 dəfə qalib gəlib.
Bütün çempionatların iştirakçısı olan “Neftçi” ilk qələbəsini 1992-ci ildə qazanıb. Mayın 8-də Sumqayıt “Xəzər”i ilə qarşılaşan Bakı klubu 1:0 hesabı ilə üstün olub.
Qeyd edək ki, “Neftçi” qələbə sayında yalnız “Qarabağ”dan geri qalır. Rekordçu olan ağdamlılar 505 dəfə rəqibini məğlub edib.