Paytaxtın AZAL klubu Unibank Premyer Liqasında özünün 200-cü qolunu vurub. Mövsümün XXI turunun “Turan”la qarşılaşmasına qədər hesabında 199 qol olan paytaxt təmsilçisi yubiley qolunu elə matçın ilk dəqiqəsində rəqib qapısından keçirib. Matçda dubl edən Zohair Benouahinin ilk qolu komandası üçün yubiley əhəmiyyəti kəsb edib.

2005/06 mövsümündə Azərbaycan çempionatının güclülər dəstəsində “Olimpik” adı altında debüt edən, sonradan “Olimpik-Şüvəlan”, indi isə AZAL adını daşıyan klub 200-cü qolunu Premyer Liqadakı 7-ci mövsümündə vurub. Mərakeşli legionerin vurduğu yubiley qolu ilə kifayətlənməyən bakılılar matçın sonunadək bu rəqəmi 202-yə də çatdırıb ki, bunlar da 186 qarşılaşma ərzində reallaşıb.

AZAL-ln Premyer Liqadakı bütün qolları

AZAL-ın tarixi qolunun müəllifi olan Benouahi bunu bacaran 3-cü legioner olub. Belə ki, paytaxt təmsilçisinin 50-ci və 150-ci qolları da əcnəbilərdən, ilk və 100-cü qolu isə yerli oyunçulardan gəlmişdi. Tarixi qollarından 4-nü öz meydanında vuran bakılılar yalnız 100-cü qolu səfərdə rəqib qapısından keçirib. Belə qolların vurulduğu matçlarda adətən qələbə qazanan AZAL üçün yalnız ilk oyun uğursuzluqla nəticələnib.

AZAL-ın çempionatda tarixi qolları

Qeyd edək ki, yubileylə əlamətdar qarşılaşmada dubl edən Zohair həm də klubun Premyer Liqadakı ən yaxşı bombardirləri sırasına qoşulub. AZAL-ın 202 qolunun müəlliflərindən yalnız 6-sı 10 və ya daha çox fərqlənib. Junivan Suaresin 17 qolla ən yaxşı bombardiri olduğu komandada Benouahi və Xaqani Məmmədov 13, Anatoli Doroş 12, Leandro Qomeş və Qvidas Yuşka 10 qol sevinci yaşayıb. 202 qoldan 4-nü isə rəqiblər avtoqol etməklə vurub.