Bu gün Peşəkar Futbol Liqası və "Topaz" arasında strateji əməkdaşlıq haqqında müqavilənin imzalanması ilə əlaqədar konfrans keçirildi.
Mərasimdə PFL-in prezidenti Ramin Musayev, “Azərinteltek” şirkətinin Direktorlar Şurasının sərdi Ahmet Geylani Sezer, “Azəridmanservis”in Direktoru Azər Məhərrəmov, AFFA-nın baş katibi Elxan Məmmədov ilə yanaşı KİV nümayəndələri və futbol ictimaiyyətinin tanınmış simaları, bir sıra xarici qonaqlar - Türkiyənin “Fenerbahçe” klubunun əfsanəvi kapitanı Selçuk Yula, Fransanın “Lans” klubunun keçmiş prezidenti və Fransa Futbol Federasiyasının vitse-prezidenti Jerve Martel, həmçinin keçmiş futbolçular – Jan Pyer Papen, Olivye Dakur və Jüslen Blonşar iştirak ediblər.

İlk olaraq mərasimdə iştirak edən rəsmi şəxslər Peşəkar Futbol Liqası və “Topaz” arasındakı əməkdaşlıq haqqında fikirlərini və diləklərini bildirdilər.
Ramin Musayev, Peşəkar Futbol Liqasının prezidenti: “Bütün tədbir iştirakçılarını salamlayıram və belə bir xoş gündə bizimlə birlikdə olduğunuz üçün hər birinizə minnətdarlıq edirəm. Artıq Premyer Liqanın beş turu geridə qalıb. Media nümayəndələrinin həsrətlə gözlədiyi gün gəlib çatdı. İmzalanma mərasiminin gecikməsinin səbəbi geniş şəkildə müzakirələrin olması idi. Burada söhbət tək sponsorluqdan getmir, əsas məsələ futbolun inkişaf etməsidir. “Topaz”la müqavilənin bütün bəndlərində razılaşdıq və bu razılığı rəsmiləşdirmək qərarına gəldik”.
Elxan Məmmədov, AFFA-nın baş katibi: “Bu gün çox önəmli bir gündür. Çünki “Topaz” şirkəti artıq Azərbaycan Premyer Liqasının titul sponsorluğunu rəsmiləşdirəcək. PFL və “Topaz” şirkətlərini bu münasibətlə təbrik edirəm. Bu, bir daha göstəriri ki, Azərbaycanda Premyer Liqaya maraq artır. Ümid edirəm ki, bu uzunmüddətli əməkdaşlığın Azərbaycan futbolunun inkişafına böyük töhvəsi olacaq. Hər birinizi təbrik edirəm”.
Azər Məhərrəmov, “Azəridmanservis” şirkətinin direktoru: “Çox əlamətdar və mühüm bir gündür. Artıq Premyer Liqa uzun müddətdir fəaliyyətdə olan “Topaz” markalı dövlət layihəsinin adını daşıyacaq. Azərbaycan idmanının inkişafında çox önəmli bir gündür. “Azəridmanservis” tək futbol sahəsində yox, idmanın bir çox sahələrində inkişafa nail olub. Bütün idman ictimaiyyətini bu əlamətdar hadisə münasibəti ilə təbrik edirəm”.
Ahmet Geylani Sezer, “Azərinteltek” şirkətinin Direktorlar Şurasının sədri: “Bu gün uzun zamandır üzərində çalışdığımız bir layihəyə başlayırıq. Bizim hədəfimiz Azərbaycanda idmanın inkişafına nail olmaqdır. Futbolun inkişafı da bizim üçün çox önəmlidir. Bu anlaşmanın bugünkü səviyyəyə gəlməsinə görə Ramin müəllim və Azər müəllimə təşəkkürümü bildirirəm. Çünki, hamı bu işə daha da yaxşı alınması düşüncəsi ilə yanaşıblar. Bizim hədəfimiz gələcək üç il ərzində Azərbaycan futbolunun inkişafında, az da olsa, əməyimizin olmasıdır. Bu müqavilənin Azərbaycan futbolu üçün uğurlu olacağına inanıram”.
Çıxışlardan sonra PFL-in prezidenti Ramin Musayev və “Azərinteltek” şirkətinin Direktorlar Şurasının sədri Ahmet Geylani Sezer 3 illik strateji əməkdaşlıq müqaviləsi imzaladılar.
İmzalanan müqaviləyə əsasən 19 sentyabr tarixindən etibarən “Topaz” Azərbaycan Premyer Liqasını dəstəkləyəcək və bu liqanın adı “Topaz Premyer Liqası” adlandırılacaq.

Türkiyə futbolunun əfsanəvi simalarından olan Selçuk Yula PFL və “Topaz” arasında imzalanan müqavilə ilə bağlı fikirlərini bildirdi: ““Topaz Premyer Liqası”nın Azərbaycan futboluna uğurlu olacağını düşünürəm. Çağdaş futbolda sponsorluğun çox böyük önəmi var. Biz Türkiyə futbolunun inkişaf yoluna baxsaq, bunu açıq şəkildə görərik. Türkiyədə klublara sponsorluq edildikdən sonra Avropada uğurlar qazanılmağa başlanıldı. Bu müqavilənin Azərbaycan futboluna çox xeyirli olacağına inanıram. Əminəm ki, Azərbaycan futbolu çox qısa zamanda Avropadakı layiqli yerini tutacaq. “Neftçi” klubuna da “Partizan” ilə oyunda uğurlar arzulayıram”.

Daha sonra KİV nümayəndələrinin sualları cavablandırıldı.
Ramin Musayev, Peşəkar Futbol Liqasının prezidenti: “Üç illik müqavilə imzalandı. Bu üç il ərzində tək “Topaz”ın reklamı yox, futbolun inkişafına dair nə bacarırıqsa, əl-ələ verib çalışacağıq. “Topaz”ın bizə sponsorluğa görə ayırdığı pulun bu şirkətin reklamına aidiyyatı yoxdur. Yəni, “Topaz” yenə də öz reklamını davam etdirə bilər. Qaldı ki, “Şuşa”nın adına stadionun tikintisinə, mən sözümdən qaçan adam deyiləm. “Şuşa”nın gərək stadion tikmək üçün yeri ola ki, mən də bu tikinti üçün pul xərcləyim. “Şuşa”nın keçmiş prezidenti söz vermişdi ki, rəhbərlik tərəfindən 6 hektar torpaq ayrılacaq. Torpaq yoxdursa, stadionu harada tikə bilərik? Premyer Liqanın hər turunun üç qarşılaşmasını canlı yayımlaya biləcək telekanal varsa, yayım hüququnu hədiyyə verirəm demişdim. Heç kim bizdən bunu istəmədi. Yayım hüququnu AzTV-yə Əhməd bəyə görə hədiyyə etdim. Çünki, Əhməd bəy söz verdi ki, hər turun ən azı üç oyunu canlı yayımlanacaq. Bizim marağımız odur ki, oyunlar televiziya vasitəsi ilə göstərilsin və futbolsevərlər televiziyadan oyunları izləyə bilsinlər. Ötən çempionatda elə komandalar var idi ki, bir dənə də olsun ev oyunu canlı yayımlanmadı. Yayım hüqunu üçüncü bir tərəfə vermək şərti ilə və oyunların vaxtı PFL ilə razlışdarılmaqla yayım hüququ “Topaz” şirkətinə verilib”.

Ahmet Geylani Sezer, "Azərinteltek" şirkətinin Direktorlar Şurasının sədri: “Bu gün imzalanan müqavilə ilə Azərbaycan Premyer Liqasının titul sponsoru olduq. Bu işlə bizim reklam büdcəmiz tamamilə ayrıdır. Buraya ayrılan pul reklam büdcəsindən ayrılan pul deyil. Sponsorluğa görə verilən pul futbolun inkişafı üçün öz hissəmizə düşən gəlirdən verilir. Liqaya sponsor olmağın təbii ki, bəzi məsuliyyətlətləri də var. Sadəcə adı alıb bunun reklamı ilə kifayətlənməyi düşünmürük. Liqanın inkişafı üçün planlaşdırdığımız çalışmalar var. “Ayın futbolçusu” kimi, KİV nümayəndələri üçün müəyyən yarışların təşkil edilməsi kimi planlarımız var. Keçən il üçlü bir razılaşma əldə olunub. AFFA, Gənclər və İdman Nazirliyi və “Azərinteltek” arasında şübhəli oyunlarla əlaqədar məlumatların qarşılıqlı olaraq ötürülməsi ilə bağlı razılığımız var. Buna bənzər bir anlaşma da Türkiyə Futbol Federasiyası ilə əldə etmişik. Avropada iki futbol federasiyası ilə anlaşma əldə edən tək şirkətik. Bizim hədəfimiz etik məsələlərdə də dövlətimizlə əməkdaşlıq etməkdir”.