Bu gün AFFA-nın inzibati binasında Premyer Liqanın 2019/2020-ci illər mövsümünün püşkatma mərasimi keçirildi. Mərasimdə Peşəkar Futbol Liqasının prezidenti Ramin Musayev, elita klublarının təmsilçiləri, jurnalistlər, futbol ictimaiyyətinin digər nümayəndələri iştirak etdilər.
Tədbiri giriş sözü ilə açan Peşəkar Futbol Liqasının Mətbuat və İctimaiyyətlə Əlaqələr Departamentinin rəhbəri Aslan Şahgəldiyev qısa məlumatdan sonra sözü PFL prezidenti Ramin Musayevə verdi. Qurum rəhbəri çıxışı zamanı bir sıra məqamlara toxundu: “Bütün klublara uğurlar arzulayıram. İnşallah, güclü olan qalib gələr və ölkəmizi avrokuboklarda layiqincə təmsil edər. “Neftçi” və “Qarabağ”ın avrokuboklarda çıxışını uğurla davam etdirməsi hamımızı sevindirir. Xüsusən “Arsenal” (Rusiya) üzərində qələbəni qeyd etmək istəyirəm - avrokuboklarda rus komandalarına qarşı ilk qələbəmiz idi və orada yaşayan həmvətənlərimizə böyük sevinc bəxş etdi. Peşəkar Futbol Liqası yaranan tarixdən milli çempionatımızda mükafat qazanan klubların avrokuboklarda tutduqları yerə uyğun nəticələr göstərməsi bizi sevindirir və şəffaflığı təmin edə bildiyimizi göstərir. Bu mövsümdən “Topaz”la əməkdaşlığımız dayandırıldı. Peşman deyilik. Xarici bukmeyker kontorlarından birindən yaxşı təklif almışıq, hələki adını çəkməyəcəyik. Sponsorluq üçün “Topaz”dan daha yaxşı şərtlər irəli sürülüb. Komandalara mövsüm üçün 100 ədəd “Nike” topları hədiyyə olunacaq. Topların klublara verilməsində AFFA-nın baş katibi Elxan Məmmədovun zəhməti böyükdür, ona təşəkkürümüzü bildiririk. Çempionatımız 16 avqust tarixində start götürəcək. Bu mövsümdən yeni elektron sistemimiz fəaliyyət göstərəcək. Klublar legionerlərin ödənişini vaxtında verməsə, həmin oyunçunun adını elektron protokola yaza bilməyəcək. Bu, həmçinin cəriməli oyunçulara da aiddir.” Daha sonra söz Texniki-idman Departamentinin rəhbəri Elgiz Abbasova verildi: “Hər kəsi salamlayıram. Bu mövsümdən çempionatımızda bir sıra yeniliklər tətbiq olunacaq. Oyun protokolları elektron qaydada təqdim ediləcək. Artıq oyundan əvvəl komandaların oyunun protokolunda səhv etməsi mümkün olmayacaq, sistem doldurulanda limit pozulsa, avtomatik olaraq protokol qəbul edilməyəcək. Bütün komandalara oyun günü planı göndərmişik. Oyun günü planını lazımı yerlərə qoymağınız məcburidir. Klublarımızın təklifləri əsasında yeni əsasnaməmizə dəyişikliklər etmişik. A buraxılışı ilə bağlı da yeniliyimiz var və bu ondan ibarətdir ki, 2019/2020 mövsümündən sənədin üzərində sahibinin şəkli də olacaq və A buraxılışı başqalarına verilə bilməyəcək.” Sonda yenidən çıxış edən PFL prezidenti Ramin Musayev jurnalistlərin suallarına cavablandırdı:

“Qəbələ”nin əvəzediciləri diviziona buraxmayacağı deyilir, buna görə cərimələnəcəklər? I Divizionda komanda sayı dəqiqləşib?
- Bəli, iştirak etməkdən imtina ediblər və 100.000 manat cərimələnəcəklər. Əvəzedicilərini diviziona buraxan klublara AFFA tərəfindən 50.000 manat ayrılacaq. Növbəti mövsüm I Divizionda 13 komanda iştirak edəcək və 22-23 avqust tarixdə start götürəcək.

Bu il I Divizionun daha tez başlaması nə ilə əlaqədardır?
- Sentyabrın əvvəlində millinin oyunları ilə əlaqədar təqvim belə qurulub. Etiraf edək ki, çempionatı milliyə görə təşkil edirik. Buna görə də, çempionatı milliyə uyğunlaşdırmağımızı normal hesab edirəm.

Gələn il çempionatda komandaların sayı ilə bağlı yenilik gözlənilir?
- AFFA İcraiyyə komitəsində bununla bağlı müzakirələr aparılıb, gələn mövsümdən Premyer Liqada 10 komanda mübarizə aparacaq.

Sizə elə gəlmir ki, bu yerdə qalan 8 komandaya Premyer Liqanı tərk etməyəcəklərinə zəmanət kimi görünür?
 - Bütün komandalarımız avrokuboklar uğrunda mübarizə aparır. Heç kim təminat verə bilməz ki, gələn mövsüm 1 komanda çempionatı tərk edib, 3 komanda gəlməyəcək. Hər şey komandaların bizə müraciətindən asılıdır.

Qeyd edək ki, Premyer Liqada 2019/2020-ci illər mövsümünün ilk turu 16-18 avqust tarixlərində baş tutacaq.