Bu gün AFFA-nın inzibati binasında  Azərbaycan Kubokunun 2018/2019-cu illər mövsümünün püşkatma mərasimi keçirildi. Peşəkar Futbol Liqasının təşkilatçılığı ilə baş tutan mərasimdə klub nümayəndələri, media mənsubları və digər qonaqlar iştirak etdilər.
Tədbiri girişi nitqi ilə açan Peşəkar Futbol Liqasının Mətbuat və İctimaiyyətlə Əlaqələr Departamentinin rəhbəri Aslan Şahgəldiyev sözü qurumun prezidenti Ramin Musayevə verdi. R.Musayev qonaqları salamladıqdan sonra bir sıra maraqlı məqamlara toxundu:
“Hər birinizi salamlayıram. Azərbaycan Kubokunun qarşıdan gələn mövsümündə bütün iştirakçılara uğurlar arzu edirəm. Güclü olan qalib gəlsin.  Azərbaycan Kubokunun yeni sahibi olacaq komanda ölkəmizi avrokuboklarda layiqincə təmsil etsin və ən azından “Neftçi”, “Qarabağ” və “Qəbələ”nin  uğurlarını təkrarlasın. Kubokun yeni mövsümü  ilə bağlı yenilik ondan ibarətdir ki, 4-cü əvəzetməyə icazə veriləcək.  Belə ki, məşqçilər oyun  əlavə vaxta gedəcəyi təqdirdə 4-cü əvəzetmədən istifadə edə biləcəklər. Düzdür, kubokda komandaların sayı azdır. Amma bu nə AFFA-nın, nə də PFL-in günahıdır. Ümumi vəziyyət belədir”.
PFL prezidenti Topaz Premyer Liqasındakı vəziyyətə də qısaca toxundu: “Onu qeyd etmək istəyirəm ki, bizim çempionat maraqlı mübarizə şəraitində keçir. Bəli, komandalar bir-biriylə tez-tez görüşür. Ancaq matçlar gərgin mübarizə şəraitində keçir". 

Qeyd edək ki, Azərbaycan Kubokunun ilk oyunları dekabrın birinci həftəsində reallaşacaq.