Unibank
Premyer Liqasında aprel və may ayları üçün “ən yaxşı oyunçu”ların
mükafatlandırılması mərasimi keçirilmişdir. Tədbiri giriş sözü ilə açan Unibank
KB-nin Marketinq Departamentinin rəhbəri Yevgeni Soltanov bu nominasiyada ötən
3 mövsüm ərzində 25 futbolçunun mükafatlandırıldığını qeyd etdi. Cari mövsümdə
isə artıq doqquzuncu mükafatlanırma mərasiminin olduğunu vurğulayan Y.Soltanov
bu dövr ərzində əməkdaşlıq edən bütün KİV nümayəndələrinə öz təşəkkürünü
bildirdi.
Daha
sonra çıxış edən Unibank KB-nin İdarə Heyətinin sədri Faiq Hüseynov nitqində
bunları bildirdi: “Peşəkar Futbol Liqası ilə 3 illik müqaviləmiz başa çatır.
Lakin bu, əməkdaşlığın başa çatması demək deyil. PFL-lə və qurumun rəhbəri Ramin
Musayevlə əməkdaşlıqdan məmnunuq. Bu, futbolda ilk təcrübə idi. İnanırıq ki,
Unibankın Premyer Liqaya sponsorluq etməsi ölkəmizdə futbola olan marağı daha
da artırdı. Son zamanlar futbolumuzda inkişaf gedir, yeni stadionlar tikilir,
yeni klublar yaranır. PFL-lə birgə layihəmizdən razı qaldım, Ramin Musayevə və bizimlə
əməkdaşlıq edən bütün media nümayəndələrinə təşəkkürümü bildirirəm”.
Mükafatlandırma
mərasimində çıxış edən PFL-in prezidenti Ramin Musayev bunları bildirdi: “Bütün
bu müddət ərzində KİV nümayəndələri ilə birlikdə olduq, aramızda çəkişmələr də
oldu. Unibank Azərbaycan futbolunda ilkə imza atdı. Bu tərəfdaşlıqda əsas
maliyyə yox, futbola göstərilən diqqət və qayğı idi. Unibankdan sonra digər
banklar da futbolumuza investisiya qoymağa başladı. Unibankın futbola göstərdiyi
qayğı heç zaman unudulmayacaq. Gələcəkdə də Unibankla əməkdaşlıqda maraqlıyıq”.
Qaliblərin
mükafatlandırılmasından sonra Ramin Musayev və Faiq Hüseynov KİV nümayəndələrinin
suallarını cavablandırdılar.
Ramin
Musayev: “Mətbuatda I Divizion komandalarının lisenziya ala bilməməsi haqqında
çox məqalə var idi. Birisi PFL-i günahkar görür, digəri AFFA-nı. Lakin, əgər
klub mövsüm boyu əziyyət çəkirsə, futbolçu yetişdirirsə, lakin öz günahı
ucbatından lisenziya ala bilmirsə, bu zaman yalnız özü günahkardır,
futbolçuların arzusunu gözündə qoyur. Əgər belə hallara güzəşət getsək çempionatımız
ağır cərimələnər. Ölkəmizə qarşı müsbət rəy yaratmalıyıq. “Xəzər Lənkəran”ın 6
xalının qaytarılması mənim ad günüm üçün ən böyük sevinc oldu. Azərbaycan
klubuna qarşı haqsızlıq edilmişdi, haqq-ədalət öz yerini tapdı. Əgər “Sumqayıt”
AFFA-nın komandası olsa idi çempionatı son pillədə başa vurmazdı. “Turan”
klubunun ölkə futbolu üçün böyük zəhməti var. Hər bir klubda, hər milli
komandamızda “Turan”ın yetirmələri çıxış edir. Mən, çempionatımızda Azərbaycan
futboluna xeyir verən klubların qalmasının tərəfdarıyam. İlk dəfə olaraq, ölkə
çempionatı ardıcıl üç mövsüm eyni sistemləl keçirildi. Gələcəkdə də bu formatda
davam etdirilməsinin tərəfdarıyam. “İkinci altılıq”da rəqabət “ilk altılıq”dan
daha çox idi. “Rəvan” və AZAL komandaları iddiaları ilə gələn mövsümə
hazırlaşdıqlarını bildiriblər. Növbəti mövsümdə çempionatda hamının razı
qalacağı yeni sistem tətbiq etmək istəyirik. Bu mövsümün qaliblərinin
mükafatlandırılması mərasimini avrokuboklardan öncə təşkil etmək istəyirik. Lakin
komandaların ev-səfər oyunları səbəbindən bu alınmazsa, tədbir çempionatdan öncə
keçiriləcək”.
Faiq
Hüseynov: “Unibank olaraq əməkdaşlığımızı davam etmək niyyətindəyik. PFL tərəfindən
də qarşılıqlı marağın olmasını qısa zamanda biləcəyik. Razılıq olarsa, yalnız
texniki detalları danışmaq qalır”.
|