Futbol üzrə Azərbaycan I Divizionunun yeni mövsümünün püşkatma mərasimində çıxış edən Peşəkar Futbol Liqasının prezidenti Ramin Musayev öz fikirlərini bildirib:

“Yeni mövsümün püşkatmasının hər biriniz üçün uğurlu olmasını arzulayıram. Bir neçə il öncə klublarımız bir mərhələ keçəndə bayram edirdik. Artıq böyük nailiyyətlər əldə etməyə alışmışıq. Ona görə də dünən “Neftçi”nin pley-off mərhələsində məğlub olması hamımıza pis təsir etdi. İlk dəfə bir neçə mərhələ adlamaq sevincini bizə yaşadan da, avrokuboklarda öz sözünü deyən də “Neftçi” olub. Təəssüf ki, dünən bizi sevindirə bilmədi. Amma “Qarabağ”ın dünən qrup mərhələsinə vəsiqə qazanması ölkəmizin təbliğ olunması baxımından çox yaxşıdır. Bir gün “Şuşa” klubu da qrup mərhələsinə vəsiqə qazanarsa sevinərəm. Bu, bizim üçün vacibdir.  Bir-birimizə dəstək olmalıyıq. Futbol idmandır, şoudur. Burada əsas məsələ “Qarabağ”ın adıdır. Püşkatmada yalnız bir ad yazılacaq – “Qarabağ” - Azərbaycan. Yəqin ki, bu, başqa klublarımız üçün də  bir örnək olar. Futbolumuzun bu səviyyəyə qalxması ölkə başçısı cənab İlham Əliyevin idmana olan qayğısından xəbər verir. Buna qədər digər idman növlərində uğurlarımız var idi, futbolda isə bir az “axsayırdıq”. Danılmaz faktdır ki, artıq ikinci komandamız Avropa Liqasının qrup mərhələsinə vəsiqə qazanır. Ölkələrin reytinqinə baxanda neçə ölkəni geridə qoyduğumuzu görə bilərsiniz. Postsovet məkanında yalnız Rusiya, Ukrayna və Belarusiyadan geri qalırıq. 340 gürcüstanlı oyunçu legioner həyatı yaşayır. Bizdə isə bu say çox azdır. Bəzən tətbiq olunan gənc oyunçu limitinə görə bizi tənqid edirlər. Hər mövsüm sonunda futbol ictimaiyyətinə yeni təkliflərlə bağlı müraciət edirik. Mövsüm öncəsi bir neçə I Divizion təmsilçisi gənc oyunçu tapa bilməməsindən gileylənirdi. Lakin heç biri rəsmi müraciət göndərmədi ki, mən də bu məsələni İcraiyyə Komitəsində qaldırım. Normal səviyyəli futbolçularımız barmaqla sayılacaq qədərdir, kifayət qədər də pul qazanırlar. Gənc futbolçuların sayı artandan sonra rəqabət də artacaq. Limitlə bağlı bir neçə mövsüm müəyyən qədər çətinlik olacaq, amma tezliklə bunun bəhrəsini görəcəyik. I Divizion klublarından Premyer Liqaya çox az sayda oyunçu gəlir. İlk dəfə olaraq Premyer Liqada Unibankla əməkdaşlıq etmişik. Premyer Liqamıza hal-hazırda isə Topaz sponsorluq edir. Yeni mövsümdən I Divizionda mübarizə aparacaq “Zirə” klubuna Kapital Bank maliyyə yardımı ayırır. Onların rəhbərliyinə minnətdarlığımı bildirirəm. Topaz hər bir Divizion komandası üçün təmənnasız olaraq 30 futbol topu verib. Bu, Premyer Liqada ötən mövsüm oynanılan topların eynisidir. Elə klublarımız var idi ki, normal oyun toplarını almağa imkanı yox idi. Məşqlərdə və oyunlarda müxtəlif toplardan istifadə edirdilər. Bu da gənc futbolçuların inkişafına mənfi təsir göstərirdi. Topaz-ın sayəsində artıq bu məsələ də öz həllini tapıb. Buna görə Topaz rəhbərliyinə minnətdarlığımı bildirirəm. Hər bir klubumuzun sponsoruna futbola verdiyi töhfəsinə görə təşəkkürümü bildirirəm, hər birinizə yarışlarda uğurlar arzulayıram. İstənilən I Divizion komandasının Premyer Liqaya yüksəlməsi bizim üçün sevindirici haldır. Futbolun insanlarımıza verdiyi sevinc çox böyükdür. Bu hissləri daha çox yaşatmalıyıq”.